هُداتُرسیئے بَهتاوری
دێم په اورشَلیما برزاد رئوگئے سئوتے.
128
بَهتاور هما اِنت که هُداوندئے تُرسی دلا اِنت وآییئے پرمانبرداریا گامَ جنت.
2 تئو وتی زَهمتئے بَر و سمرا ورئے و
بهتاور و وشهالَ بئے.
3 تئیی جَن تئیی لۆگئے تها
چۆ بر آورێن انگورا بیت،
تئیی چُکّ تئیی پرزۆنگئے چَپّ و چاگردا
چۆ زئیتونئے نهالا بنت.
4 هئو، هما مردم که هُداوندئے تُرس آییئے دلا اِنت
همے ڈئولا بَهتاورَ بیت.
5 هُداوند چه سَهیونا ترا برکت بدئیات،
اورشَلیمئے آبادیا بگنداتئے،
وتی زِندئے سجّهێن رۆچان.
6 وتی چُکّانی چُکّان بگنداتئے،
اِسراییل اێمن و سلامت بات.